Buhok na panakip

Click for English version

1 Cor 11:

1Tumulad kayo sa akin gaya ko na tumulad din kay Cristo.

2Mga kapatid, pinupuri ko kayo na sa lahat ng mga bagay ay naalala ninyo ako. Sinusunod din ninyo ang mga kaugalian ayon sa pagkakatagubilin ko sa inyo.

3Ibig kong malaman ninyo na ang pangulo ng bawat lalaki ay si Cristo. Ang pangulo ng bawat babae ay ang lalaki. Ang pangulo ni Cristo ay ang Diyos.

4Ang bawat lalaking nananalangin o naghahayag nang may takip ang ulo, ay nagbibigay ng kahihiyan sa kaniyang ulo.

Tandaan po natin ang banggit sa lalaki kapag naghahayag nang may takip ang ulo ay nagbibigay ng kahihiyan sa kaniyang ulo. (puwedeng lumundag sa bersikulo 14Hindi ba ang kalikasan na rin ang nagturo na kapag mahaba ang buhok ng lalaki, iyon ay kasiraang dangal sa kaniya?)

5Ang bawat babaeng nananalangin at naghahayag nang walang panakip ng ulo ay nagbibigay ng kahihiyan sa kaniyang ulo. Ang walang panakip ng ulo ng babae ay tulad na rin ng inahitan ng buhok.

'Yung babaeng hindi kilala ang Dios, mapa-may-asawa man o wala, naiinis sila kapag sobrang haba ng buhok kaya nagpapagupit, ang iba nagpapakalbo. Karamihan sa mga babaeng ganiyan ayaw mapagsasabihan. Napansin ko nga na ginagawa nilang ander de saya ang kani-kanilang asawa, o ang lalaki.

Ang sabi sa talata, ang walang panakip ng ulo ng babae ay tulad na rin ng inahitan ng buhok, kasi nga walang panakip kaya kapag walang panakip man o inahitan, ay nagbibigay ng kahihiyan sa kaniyang ulo. Kapag kalbo, walang panakip. Ano ba ang panakip sa ulo kung hindi inahit? Ang sagot ay buhok. Ang buhok ay may sinisimbulo. Ituloy po natin ang basa.

6Ito ay sapagkat kung ang babae ay walang panakip ng ulo, magpagupit na rin siya. Ngunit kung kahihiyan para sa babae ang siya ay magpagupit o magpaahit, maglagay na lang siya ng panakip ng ulo. (puwedeng lumundag sa bersikulo 15Ngunit sa babae, kung mahaba ang buhok niya, iyon ay kaluwalhatian sa kaniya sapagkat ang mahabang buhok ay ibinigay sa kaniya bilang panakip).

Ang sabi sa talata 5...ang babae na walang panakip ng ulo ay para na ring inahitan o pinakalbo at ang kalalabasan ay magbibigay sa kaniya ng kahihiyan. Sa talatang 6, sinasabi na kung ang babae ay walang panakip ng ulo, magpagupit na rin siya. Ipinakita ang pagtutulad na ang inahitan at ginupitan ay magkatulad lang ng kalagayan, dahil pagupit man o paahit, mananatiling walang panakip ang ulo. Ngayon kung kahiya-hiya ang magpapagupit ang babae o magpapaahit, maglagay na lang ng panakip ng ulo.

Kapag ang babae ay nagpaahit o nagpagupit ng buhok, kahit pa maglagay ng panakip ng ulo ('yung artificial na panakip ng ulo), mananatili pa rin siyang kalbo o nagpagupit at mananatili pa rin siyang kahiya-hiya.

Kung hindi magpapaahit o magpapakalbo, ano ang gagawin ng babae? Hayaan niya ang buhok niyang humaba, huwag galawin. Madalas manalangin ang mga babaeng Kristiyano. Kapag artificial na panakip ang susundin natin, paano kung mawala ang artificial na panakip ng ulo? Hindi na ba sila makakapanalangin? Paano na ang mga babae sa africa? Ni pambili nga ng pagkain wala sila, artificial na panakip ng ulo pa kaya?

Ngayon, kung mahaba ang buhok ng ulo ng babae na hindi ginupitan, kahiya-hiya ba siya kung walang artificial na panakip ng ulo?

Kung sa tingin ninyo na hindi buhok ang panakip, basahin natin ang susunod na talata. Pero bago iyon magsasalita ako bilang lalaki.

Bilang lalaki, nagpapagupit ako ng buhok. Puwede rin akong magpakalbo o magpaahit ng ulo (pareho lang 'yun walang matitirang buhok na makikita, pero kung makapal ang buhok mo, maitim ang bumbunan kasi may ugat pa ang buhok na maitim).

Kapag hindi ko pinutol o pinakalbo, hahaba ang buhok ko. Kahihihiya naman kung hahayaan kong humaba hanggang sa huminto ito ayon sa naturalesa o katalagahan ng paghaba, lalo na kung ang naturalesa ng buhok ko ay hanggang puwet, halimbawa.

Kung ang kaya lang ng buhok ko ay humaba hanggang batok at hinayaan ko, hinayaan ko na ang naturalesa kaya mahaba ito kumpara kung ginupitan hanggang tenga.

Kaya para labagin ang naturalesa, imbes na hayaan ang buhok ko hanggang batok, papagupit ko hanggang tenga na lang.

Kung hindi ko gugupitin ang buhok at umabot sa bewang tapos huminto na sa pagtubo, hanggang doon na lang ang naturalesa o katalagahan. Para labagin ko ang naturalesa papagupit ko hanggang tenga.

Kung gugupitin ko ang buhok ko, maiksi na ito. Kung kakalbuhin ko, maiksi na rin gaya ng ginupitan ko. Hindi nga lang magsinghaba, kasi kapag kalbo, ang buhok hindi na nakausli, pero may ugat pa rin, kaya kung ikukumpara sa ginupitan, parehong may buhok, hindi nga lang kita kapag kalbo.

Dahil lalaki ako, kung papagupit ako hanggang braso, magmumukha akong babae, kasi nga karaniwan sa babae lagpas leeg ang buhok ayon sa naturalesa. Maliban na lang kung kalbo na talaga, bahala na ang Dios, bilang nga niya ang dami niyon.

7Ito ay sapagkat ang lalaki ay hindi na dapat magtakip ng ulo dahil ito ang wangis at kaluwalhatian ng Diyos. Ang babae ay ang kaluwalhatian ng lalaki.

Makikita na ang lalaki ay magpapagupit o mag-aahit ng ulo dahil kung hindi, hahaba ang buhok niya. Kapag humaba at hindi gugupitan o aahitan, magkakaroon ng takip ang ulo niya.

Sinisimbulo ng lalaki na mayroong maiksing buhok na siya ay lalaki na may wangis at kaluwalhatian ng Dios at siya ay nagpapasakop kay Cristo.

Ang mahabang buhok ng babae ay masasabing mahaba ayon sa naturalesa dahil hindi inahit at hindi rin pinutulan. Ang babae ay ang kaluwalhatian ng lalaki. Ang babaeng binanggit ay may mahabang buhok na hindi ginupitan, hindi lumabag sa naturalesa o katalagahan.

8Ito ay sapagkat ang lalaki ay hindi nagmula sa babae. Ang babae ang siyang nagmula sa lalaki. 9Ito ay sapagkat ang lalaki ay hindi nilikha para sa babae kundi ang babae ay nilikha para sa lalaki. 10Dahil dito ang babae ay kailangan ding magkaroon ng kapangyarihan sa kaniyang ulo alang-alang sa mga anghel.

Ang babaeng may mahabang buhok sa ulo ay nilikha para sa lalaki. Ang babaeng may mahabang buhok ay may lalaking maiksi ang buhok sa ulo, at sila'y napapailalim sa kapangyarihan ng Dios. Kaya ang mga babae ay kailangang magkaroon ng kapangyarihan ng Dios sa kaniyang ulo alang-alang sa mga anghel.

11Magkagayunman, sa Panginoon ang lalaki ay hindi hiwalay sa babae at ang babae ay hindi hiwalay sa lalaki. 12Ito ay sapagkat ang babae ay nagmula sa lalaki, gayundin naman ang lalaki ay ipinanganganak ng babae. Ngunit ang lahat ng bagay ay nagmula sa Diyos.

Kaya ang lalaki na maiksi o kalbo at ang babaeng may mahabang buhok ay nagsisimbulo na pareho silang nasa ilalim ng kapangyarihan ni Cristo, at lalo na, sa Dios.

Ngayon ulitin natin, ano ang panakip sa ulo?:

13Kayo ang humatol. Nararapat ba sa isang babae ang manalangin sa Diyos nang walang lambong? 14Hindi ba ang kalikasan na rin ang nagturo na kapag mahaba ang buhok ng lalaki, iyon ay kasiraang dangal sa kaniya?

15Ngunit sa babae, kung mahaba ang buhok niya, iyon ay kaluwalhatian sa kaniya sapagkat ang mahabang buhok ay ibinigay sa kaniya bilang panakip.

Makinig ka Teng at ng mga kagaya mo, eto ang sabi ni Pablo:

16Kung may nagnanais makipagtalo patungkol sa bagay na ito, wala na kaming ibang kaugalian, maging ang mga iglesiya ng Diyos.

Hindi naman basta malalalaman ng ibang tao kung hanggang saan aabot ang buhok ng babae maliban na kung oobserbahan ang pagtubo sa ilang panahon, kapag hindi gugupitan.

Sa mga kapatid na babae, nakakita na ako ng matagal ng nagpapahaba ng buhok pero hanggang bewang lang, kasi nalalagas ang buhok niya kapag umabot na sa bewang. Yung mga bagong tubo, hahaba ulit 'yun at pag-abot sa bewang nalalagas na ulit.

Ang ibang kapatid na babae naman ay hanggang paa, pagkatapos, nalalagas rin ang ibang hibla, pero may papalit uling buhok.

Dati nga noong hindi pa ako umaanib sa Iglesia ng Dios na binabanggit ni Pablo, kahit lalaki ako, nagpapahaba ako ng buhok pero nakakainip. Sa loob ng isang buwan, hanggang ilong ko lang ang haba nito at parang hindi na humahaba, kaya nagpapagupit na lang ako.

Kung itutuloy ang pagbasa sa talata, makikitang ang pagtitipun-tipon sa iglesiya ay gaya ng kaugalian na itinuro tungkol sa buhok. At ito ay itinuro sa iglesia na nasasakop ng Dios. May mga pangkat nga sa loob na nagtuturo ng iba sa itinuro ni Pablo:

17Ngayon, sa sasabihin ko, hindi ko kayo pinupuri sapagkat ang pagtitipon ninyo ay hindi para sa ikabubuti kundi sa lalong ikasasama. 18Ito ay sapagkat una sa lahat, sa pagtitipun-tipon ninyo sa iglesiya, naririnig ko na may pagkakampi-kampi sa inyo. Naniniwala ako na maaaring ito ay totoo. 19Ito ay sapagkat kinakailangang mahayag ang pangkat na nagtuturo ng mga kamalian na nasa inyo nang sa gayon ay mahayag ang mga katanggap-tangap sa Diyos. 20Sa pagtitipon ninyo sa isang dako, hindi kayo nagtitipon upang kumain ng hapunan ng Panginoon. 21Ito ay sapagkat sa inyong pagkain, ang bawat isa ay kumakain ng kani-kaniyang hapunan nang una sa iba. Kaya ang isa ay gutom at ang isa ay lasing. 22Hindi ba mayroon kayong mga bahay upang doon kumain at uminom? O baka naman hinahamak ninyo ang iglesiya ng Diyos at ipinapahiya ang mga walang pagkain? Ano ang dapat kong sabihin? Pupurihin ko ba kayo sa ganito? Hindi ko kayo pupurihin.

May bahay kung saan itinuturo ang mga aral na dapat sundin, gaya ng tradisiyon. Sino ang mga walang pagkain, sino ang nasa bahay, sinu-sino ang lasing at gutom? Hindi baga isang walang kabuluhan ang pagsunod ng wala sa pananampalataya? Sino ba ang dapat magpahaba ng buhok? Ang nasa labas ng bahay? Sinu-sino ba ang lasing? Sila ba ang nagtuturo ngunit wala namang alam? Sino ba ang gutom? Sila ba ang nasa loob ng bahay? Hindi ko sasagutin ito dahil ako'y maghihintay ng kasagutan mula sa Panginoon sa pamamagitan ng pakikinig ng salita ng Dios.

Ano ang banggit ni Pablo tungkol sa mga itinuro niya?:

23Ito ay sapagkat tinanggap ko mula sa Panginoon ang siya ko namang ibinibigay sa inyo. Ang Panginoong Jesus, nang gabing siya ay ipinagkanulo, ay kumuha ng tinapay. 24Pagkatapos niyang magpasalamat, pinagputul-putol niya ito, at sinabi: Kunin ninyo, kainin ninyo, ito ang aking katawan na pinagputul-putol para sa inyo. Gawin ninyo ito sa pag-alaala sa akin. 25Sa gayunding paraan kinuha niya ang saro pagkatapos maghapunan. Sinabi niya: Ang sarong ito ay ang bagong tipan sa aking dugo. Sa tuwing kayo ay iinom nito, gawin ninyo ito sa pag-alaala sa akin. 26Ito ay sapagkat sa tuwing kakain kayo ng tinapay na ito at iinom sa sarong ito, inihahayag ninyo ang kamatayan ng Panginoon hanggang sa siya ay dumating.

27Ang sinumang kumain ng tinapay at uminom sa saro ng hindi nararapat ay nagkakasala sa katawan at dugo ng Panginoon. 28Ngunit suriin muna ng tao ang kaniyang sarili. Pagkatapos hayaan siyang kumain ng tinapay at uminom sa saro. 29Ito ay sapagkat siya na kumakain at umiinom nang hindi karapat-dapat ay kumakain at umiinom ng kahatulan sa kaniyang sarili. Hindi niya kinikilala nang tama ang katawan ng Panginoon. 30Dahil dito marami sa inyo ang mahihina at may karamdaman at marami ang natulog na. 31Ito ay sapagkat hindi tayo hahatulan kung hahatulan natin ang ating mga sarili. 32Kung tayo ay hinahatulan, tayo ay tinuturuan upang hindi tayo mahatulang kasama ng sanlibutan.

BUHOK PO ANG PANTAKIP SA ULO. Pero may mas malalim pang aral ang nabanggit na utos, kaya kailangan sumunod muna po tayong magkakapatid upang matupad ang hula. Huwag tayong makinig sa mga taga labas ng tungkol sa aral. May bahay po tayong pinagsasamasamahan, at doon tayo matututo ng aral. Anong karapatan ng tagalabas na ipahayag ang tungkol sa doktrina ng buhok? Dios na ang bahalang humatol sa kanilang sinusunod, ngunit tayo, alam nating ang ating susundin. Hihintayin ko na lang si Brother Eliseo Soriano na maghayag ng katotohan ng Dios tungkol dito, ayon sa Biblia. Ang katotohanan ng Dios, nawa'y lalong magliwanag sa mga kapatid na nakakakita na ngayon.

Click LINK for more

A Poem (Isang Tula)

Ang Lambong na Panakip

Kapatid na babae, buhok ay pahabain,
itirintas ng mabuti, pangalagaan, patibayin:
gaya ng may panaling tatlong ikid,
sa loob ng ating mga pagsasama-sama.
Huwag itong puputulin, sa kasalana'y pantakip,
upang Kaniyang lilimutin at tayo'y patatawarin.
Ang kalooban ng Ama sa Iglesia ay sasagana.
Sa ating pagsunod at pagkakaisa, maririnig Niya,
ang mga panalangin, samo, hiling at daing.
Mga anghel na nagbabantay, sa atin mangatututo.
Sa pagsaksi sa atin, magiging matalimahin,
At sila'y mangaliligtas naman din.
Kapatid na lalaki sumunod din naman,
umiwas na ang ulo ay malambungan,
sa noo'y di makintal, pawang kasinungalinan.
Huwag hahadlangang sumagana ang karunungan
upang ang bayan ay tumalino sa araw-araw.
At lilitaw ang wangis at kaluwalhatian ng Dios
sa Kaniyang Iglesia, at doon tayo ay sasamahan
ng Espiritung banal; Si Kristo Jesus ang pangulo.
Sa lahat ang Ama'y mangingibabaw: sa Kanya, karangalan.

(on or before July 11, 2007)

Though I am gay, I found the wife of Jesus Christ - a wife where I am affiliated with, a body where I am a part of: the Church of God.

Proverbs 19:14 Houses and wealth are inherited from parents, but a prudent
wife is from the LORD.